മേരി ലൂയിസ് കാഷ്നിറ്റ്സ് - ഹിരോഷിമ

ഹിരോഷിമയിൽ മരണം വീഴ്ത്തിയ മനുഷ്യൻ

സന്ന്യാസജീവിതം വരിച്ചുകഴിഞ്ഞു,

അയാളിപ്പോൾ ആശ്രമത്തിൽ മണിയടിക്കുകയാണ്‌.

ഹിരോഷിമയിൽ മരണം വീഴ്ത്തിയ മനുഷ്യൻ

ഒരു കയറിന്റെ കുരുക്കിൽ തലവച്ചു തൂങ്ങിച്ചത്തു.

ഹിരോഷിമയിൽ മരണം വീഴ്ത്തിയ മനുഷ്യൻ

സ്ഥിരബുദ്ധി ഇല്ലാത്തയാളാണിപ്പോൾ.

അണുധൂളിയിൽ നിന്നുയർന്നുവരുന്ന

നൂറായിരം പ്രേതരൂപങ്ങളുമായി

മല്ലുപിടിക്കുകയാണയാൾ, എല്ലാ രാത്രിയിലും.

ഇതൊന്നുമല്ല സത്യം.

ഇന്നലെയും കൂടി ഞാനയാളെ കണ്ടിരുന്നു,

നഗരപ്രാന്തത്തിലെ തന്റെ വീട്ടുമുറ്റത്ത്-

വളർച്ച മുറ്റാത്ത വേലിപ്പൊന്തകൾ,

ചന്തമുള്ള റോസാച്ചെടികൾ.

ഒരാൾക്കൊളിക്കാൻ പാകത്തിൽ

മറവിയുടെ കാടു വളർത്തിയെടുക്കാൻ സമയമെടുക്കും.

വ്യക്തമായി കാണാമായിരുന്നു, ആ പുതുപുത്തൻ വീട്,

പൂക്കളുടെ ചിത്രങ്ങളുള്ള വേഷത്തിൽ യുവതിയായ ഭാര്യ,

അമ്മയുടെ കയ്യിൽ പിടിച്ചു നില്ക്കുന്ന കൊച്ചുപെൺകുട്ടി,

അയാളുടെ കഴുത്തിൽ വട്ടം കയറിയിരുന്ന്

തലയ്ക്കു മേൽ ചാട്ട ചുഴറ്റുന്ന മകൻ.

തന്റെ മുറ്റത്തെ പുൽത്തകിടിയിൽ നാലുകാലിൽ നടക്കുന്ന,

ചിരി കൊണ്ടു മുഖം വക്രിച്ച അയാളെ

തിരിച്ചറിയാൻ വളരെയെളുപ്പമായിരുന്നു,

എന്തെന്നാൽ ഫോട്ടോഗ്രാഫർ, ലോകത്തിന്റെ കാണുന്ന കണ്ണ്‌,

വേലിയ്ക്കു പിന്നിലായിരുന്നു.