കിശ്വർ നഹീദ് - ഞാൻ പറയുന്നതു കേൾക്കൂ

ഞാൻ പറയുന്നതു കേൾക്കൂ:
നിങ്ങൾക്കു സംസാരിക്കണമെന്നാണെങ്കിൽ
അതിനുള്ള ശിക്ഷ മരണമാണ്‌;
നിങ്ങൾക്കു ശ്വാസം വിടണമെന്നാണെങ്കിൽ
നിങ്ങളുടെയിടം തടവറയാണ്‌;
നിങ്ങൾക്കു നടക്കണമെന്നാണെങ്കിൽ
കാലു മുറിച്ചു കൈയ്യിലെടുക്കുക;
നിങ്ങൾക്കു ചിരിക്കണമെന്നാണെങ്കിൽ
തലകീഴായി മരത്തിൽ തൂങ്ങിക്കിടക്കുക;
നിങ്ങൾക്കു ചിന്തിക്കണമെന്നാണെങ്കിൽ
എല്ലാ വാതിലും കൊട്ടിയടച്ചിട്ട്‌
താക്കോൽ ദൂരെയെറിയുക;
നിങ്ങൾക്കു കരയണമെന്നാണെങ്കിൽ
ആറ്റിൽപ്പോയി മുങ്ങുക;
നിങ്ങൾക്കു ജീവിക്കണമെന്നാണെങ്കിൽ
സ്വപ്നങ്ങളുടെ ഗുഹയിലെ മാറാലയാവുക;
നിങ്ങൾക്കു സർവ്വതും മറക്കണമെന്നാണെങ്കിൽ
ഒരുനിമിഷം നിൽക്കുക;
എന്നിട്ടോർത്തെടുക്കാൻ നോക്കുക,
നിങ്ങൾ ആദ്യം പഠിച്ച വാക്ക്‌.
*

1940ൽ ജനിച്ച പാകിസ്ഥാനികവിയും ഫെമിനിസ്റ്റുമാണ്‌ കിശ്വർ നഹീദ്.