പ്രൊമിത്യൂസിനെ സംബന്ധിക്കുന്നതായി നാലൈതിഹ്യങ്ങളാണുള്ളത്:
ഒന്നാമത്തേതു പ്രകാരം, ദേവകളുടെ രഹസ്യങ്ങൾ മനുഷ്യർക്കു ചോർത്തിക്കൊടുത്തതിന്റെ പേരിൽ അദ്ദേഹത്തെ കാക്കസസ്സിലെ ഒരു പാറക്കെട്ടിൽ കൊളുത്തിയിടുകയും, അദ്ദേഹത്തിന്റെ കരൾ കൊത്തിത്തിന്നുവാനായി (അതു നിരന്തരം വളർന്നുകൊണ്ടിരിക്കുകയുമാണ്‌) ദേവകൾ കഴുകന്മാരെ അയക്കുകയുമാണ്‌.
രണ്ടാമത്തേതു പ്രകാരം, കൊത്തിപ്പറിക്കുന്ന കൊക്കുകളിൽ നിന്നു രക്ഷപ്പെടാനായി പ്രൊമിത്യൂസ് പാറക്കെട്ടിലേക്ക് അധികമധികം ഞെരുങ്ങിക്കൂടുകയും, ഒടുവിൽ അതുമായിച്ചേർന്ന് ഒന്നാവുകയും ചെയ്തു.
മൂന്നാമത്തേതു പ്രകാരം, ആയിരക്കണക്കിനു വർഷങ്ങൾ കഴിഞ്ഞതോടെ അദ്ദേഹം ചെയ്ത വഞ്ചന മറവിയിൽപ്പെട്ടു; അതു ദേവകൾ മറന്നു, കഴുകന്മാർ മറന്നു, അദ്ദേഹം തന്നെയും അതു മറന്നു.
നാലാമത്തേതു പ്രകാരം, അർത്ഥശൂന്യമായ ഈ ഇടപാട് സർവർക്കും മടുക്കുകയാണ്‌; ദേവകൾക്കു മടുത്തു, കഴുകന്മാർക്കു മടുത്തു, മുറിവും മടുപ്പോടെ നികന്നു.
വ്യാഖ്യാനാതീതമായി പാറക്കെട്ടു മാത്രം ശേഷിച്ചു. വിശദീകരിക്കാനാവാത്തതിനെ വിശദീകരിക്കാനാണ്‌ ഐതിഹ്യം ശ്രമിച്ചത്. പക്ഷേ അതുത്ഭവിക്കുന്നത് യാഥാർത്ഥ്യത്തിന്റെ അടിത്തറയിൽ നിന്നാകയാൽ ഒടുവിലത് വ്യാഖ്യാനാതീതമാവുകയും വേണ്ടിയിരുന്നു.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ