മേരി ഒലിവർ - ഒരു വേനല്പകൽ

 

ഈലോകം ആരു സൃഷ്ടിച്ചു?
ആരു സൃഷ്ടിച്ചു അരയന്നത്തെ, കരിങ്കരടിയെ?
പുല്ച്ചാടിയെ ആരു സൃഷ്ടിച്ചു?
ഞാൻ പറയുന്നത്, ഈ പുല്ച്ചാടിയെ-
പുല്ക്കൊടികൾക്കിടയിൽ നിന്നു ചാടിപ്പുറത്തുവന്ന ഇതിനെ,
എന്റെ കയ്യിൽ നിന്നു പഞ്ചാര തിന്നുന്ന ഇതിനെ,
മേലേയ്ക്കും താഴേക്കുമല്ല, മുന്നിലേക്കും പിന്നിലേക്കും താടിയിളക്കുന്ന ഇതിനെ-
വിപുലവും സങ്കീർണ്ണവുമായ കണ്ണുകളിരുപാടും പായിക്കുന്നതിനെ.
ഇപ്പോഴവൾ തന്റെ വിളർത്ത മുൻകാലുകളുയർത്തി
വെടിപ്പായി മുഖം കഴുകുന്നു.
ഇപ്പോഴവൾ തന്റെ ചിറകുകൾ വെട്ടിത്തുറന്നൊഴുകിപ്പോകുന്നു.
പ്രാർത്ഥനയെന്തെന്നു കൃത്യമായും എനിക്കറിയില്ല.
എന്നാലെനിക്കറിയാം ശ്രദ്ധ നല്കാൻ,
പുല്പരപ്പിലേക്കു വീഴാൻ,
പുല്പരപ്പിൽ മുട്ടുകുത്താൻ,
അലസതയുടെ ധന്യത നുകരാൻ,
പാടങ്ങളിലൂടലയാൻ-
പകൽ മുഴുവൻ അതാണു ഞാൻ ചെയ്തതും.
പറയൂ, പകരം ഞാനെന്തു ചെയ്യണമായിരുന്നു?
എല്ലാമൊടുവിൽ മരിക്കില്ലേ, ചിലനേരം കാലമെത്തും മുമ്പേയും?
പറയൂ, നിങ്ങൾക്കാകെയുള്ള വന്യവും അനർഘവുമായ ഒരു ജീവിതം കൊണ്ട്
എന്തു ചെയ്യാമെന്നാണ്‌ നിങ്ങൾ മനസ്സിൽ കാണുന്നത്?