കു സാങ്ങ് - ലജ്ജ

മൃഗശാലയിൽ,
അഴികൾക്കും വലകൾക്കുമിടയിലൂടുറ്റുനോക്കിക്കൊണ്ട്
ഞാനൊരു മൃഗത്തെത്തേടുകയയിരുന്നു,
ലജ്ജയെന്നാൽ എന്താണെന്നറിയാവുന്നതൊന്നിനെ.

സൂക്ഷിപ്പുകാരാ! ഞാൻ ചോദിച്ചു,
ആ കുരങ്ങന്മാരുടെ തുടുത്ത പൃഷ്ഠങ്ങളിലൊന്നിൽ 
ഉണ്ടാവുമെന്നു വരാവുന്നതല്ലേ,
അതിന്റെയൊരംശമെങ്കിലും?

അല്ലെങ്കിലാ കരടിയുടെ കൈപ്പത്തിയിൽ,
നിരന്തരം നക്കിത്തുടയ്ക്കപ്പെടുന്നതിൽ?
ഇനിയല്ലെങ്കിൽ സീലുകളുടെ മീശരോമങ്ങളിൽ,
പച്ചത്തത്തയുടെ കൊക്കുകളിൽ?
ഒരംശം പോലുമെങ്ങുമില്ലെന്നോ?

ഈ നഗരത്തിലെ ജനങ്ങളിൽ നിന്ന്
ലജ്ജയെന്നതു മാഞ്ഞുപോയതിനാൽ
ഞാനതു തേടി മൃഗശാലയിലേക്കു വന്നതാണ്‌.
*

കൊറിയൻ ആധുനികകവിതയിലെ ഒരു പ്രമുഖനായ Ku Sang (1919-2004) സോളിൽ ജനിച്ചു. കൊറിയൻ യുദ്ധാനുഭവങ്ങളും ക്രിസ്തീയവിശ്വാസവും കവിതയെ സ്വാധീനിച്ചിട്ടുണ്ട്.