ഗോപാൽ ഹൊനാൽഗരെ - കവിതകൾ

 

ഉത്കടാവേശത്തിന്റെ രണ്ടു മുഖങ്ങൾ

എന്റെ ചുവട്ടടിയിൽ
ഒരു മണ്ണിര
എവിടെ നിന്നെന്നില്ലാതെ
എവിടെയ്ക്കോ നീങ്ങുന്നു
മണ്ണു തിന്നു തിന്ന്
ഒരു വഴി തുറന്നുകൊണ്ട്.

എന്റെ തലയ്ക്കു മേലാവട്ടെ,
ചോരച്ചുവപ്പുനിറമായ
തീരെച്ചെറിയ 
ചില ദേശാടനക്കിളികൾ
(അവയുടെ പേരെനിക്കോർമ്മയില്ല)
25 ഗ്രാം ഭാരമുള്ള ഓരോന്നും
മൂവായിരം മൈൽ ദൂരം
നില്ക്കാതെ പറന്ന്
ലക്ഷ്യത്തിലെത്തിച്ചേരുന്നു
13 ഗ്രാം മാത്രം ഭാരവുമായി.

*