എന്റെ ദൈവമേ,
ചോദ്യങ്ങളുടെ വിത്തുകളുമായി ഞാൻ വന്നു.
ഞാനവ നട്ടു, പൂവിട്ടതേയില്ലവ.
(ഒരു ചീവീടു പാടുന്നു,
നിലാവത്ത്.)
എന്റെ ദൈവമേ,
ഉത്തരങ്ങളുടെ ദളപുടങ്ങളുമായി ഞാൻ വന്നു,
കാറ്റവ കൊഴിച്ചതേയില്ല!
(ഭൂമി തിരിയുന്നു:
മഴവിൽനിറത്തിൽ ഒരോറഞ്ച്)
എന്റെ ദൈവമേ,
ഞാൻ ലാസറസ്!
എന്റെ കുഴിമാടത്തെ പുലരി കൊണ്ടു നിറയ്ക്കൂ,
എന്റെ വണ്ടിയ്ക്കു കരിങ്കുതിരകളെത്തരൂ!
(ചന്ദ്രനസ്തമിക്കുന്നു,
കാവ്യാത്മകമായൊരു മലയുടെ പിന്നിൽ.)
എന്റെ ദൈവമേ,
ഒരു ചോദ്യവും കിട്ടാത്ത ഉത്തരവുമായി,
ചില്ലകളിളകുന്നതും നോക്കി ഞാനിരിക്കാം.
(ഭൂമി തിരിയുന്നു:
മഴവിൽനിറത്തിൽ ഒരോറഞ്ച്.)
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ