നിനക്കു നന്ദി, എന്റെ ഹൃദയമേ,
വെറുതേ സമയം കളയാത്തതിന്‌,
മുഖസ്തുതിയോ പ്രതിഫലമോ വേണമെന്നില്ലാതെ
സഹജമായ ശുഷ്കാന്തി കൊണ്ടു മാത്രം
മുന്നോട്ടു പോകുന്നതിന്‌.
ഓരോ മിനുട്ടിലും
നിനക്കെഴുപതു ക്രെഡിറ്റുകൾ കിട്ടുന്നു.
നിന്റെ ഓരോ സങ്കോചവും
ലോകമൊന്നു കറങ്ങിവരാൻ
ഒരു കൊതുമ്പുവള്ളത്തെ
പുറംകടലിലേക്കു തള്ളിവിടുന്നപോലെയാണ്‌.
നിനക്കു നന്ദി, എന്റെ ഹൃദയമേ,
സാകല്യത്തിൽ നിന്നെന്നെ
അടർത്തിമാറ്റുന്നതിന്‌,
ഉറക്കത്തിൽപോലുമെന്നെ
മാറ്റിനിർത്തുന്നതിന്‌.
നീ ഉറപ്പു വരുത്തുന്നു,
ഒരു ചിറകിന്റെയും ആവശ്യമില്ലാത്ത
അവസാനത്തെ പറക്കലിലേക്ക്
സ്വപ്നം കണ്ടു ഞാൻ പറന്നുപോകുന്നില്ലെന്ന്.
നിനക്കു നന്ദി, എന്റെ ഹൃദയമേ,
ഇന്നും ഞാൻ ഉണർന്നുവെന്നതിന്‌;
ഇന്നു ഞായറാഴ്ചയാണെങ്കിലും,
വിശ്രമത്തിന്റെ ദിവസമാണെങ്കിലും,
എന്റെ വാരിയെല്ലുകൾക്കടിയിൽ
ഏതു പ്രവൃത്തിദിവസവും പോലെ
തിരക്കു തുടങ്ങിക്കഴിഞ്ഞു.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ