ലോർക്ക- പട്ടുപോലൊരു ഹൃദയം

പട്ടുപോലൊരു ഹൃദയം നിറയെ

വെളിച്ചങ്ങളുമായി,

നാവടങ്ങിയ മണികളുമായി,

ലില്ലിപ്പൂക്കളും തേനീച്ചകളുമായി

ഞാനങ്ങകലേക്കു പോകും,

ആ മലകൾക്കുമപ്പുറത്തേക്ക്,

കടലുകൾക്കുമപ്പുറത്തേക്ക്,

നക്ഷത്രങ്ങൾക്കടുത്തേക്ക്.

ക്രിസ്തുവിനോടു ഞാൻ പറയും,

എനിക്കു മടക്കിത്തരൂ, കർത്താവേ,

കുട്ടിക്കാലത്തെയെന്റെയാത്മാവിനെ,

തൂവൽത്തൊപ്പിയും മരവാളുമായി

പഴംകഥകളിൽ മുതിർന്നതിനെ.