നിക്കനോർ പാർറ - ഒരാൾ

ഒരാളുടെ അമ്മയ്ക്കു തീരെ സുഖമില്ല
അയാൾ ഒരു ഡോക്ടറെ അന്വേഷിച്ച് പുറത്തുപോകുന്നു
അയാൾ കരയുകയാണ്‌
തെരുവിലയാൾ തന്റെ ഭാര്യയെ മറ്റൊരാളുടെ കൂടെ കാണുന്നു
അവർ കൈകോർത്തുപിടിച്ചിരിക്കുന്നു
അല്പം പിന്നിലായി അയാൾ അവരെ പിന്തുടരുന്നു
ഒരു മരത്തിൽ നിന്ന് മറ്റൊന്നിലേക്ക്
അയാൾ കരയുകയാണ്‌
ഇപ്പോഴയാൾ തന്റെ യൗവ്വനത്തിലെ ഒരു കൂട്ടുകാരനെ കണ്ടുമുട്ടുന്നു
നമ്മൾ തമ്മിൽ കണ്ടിട്ടെത്ര കാലമായെടോ!
അവർ ഒരു ബാറിലേക്കു കയറുന്നു
അവർ സംസാരിക്കുന്നു, ചിരിക്കുന്നു
അയാൾ മൂത്രമൊഴിക്കാനായി മുറ്റത്തേക്കിറങ്ങുന്നു
അയാൾ ഒരു ചെറുപ്പക്കാരിയെ കാണുന്നു
രാത്രിയാണ്‌
അവൾ പാത്രം കഴുകുകയാണ്‌
അയാൾ അവളുടെയടുത്തു ചെല്ലുന്നു
അവളെ അരയ്ക്കു പിടിച്ചടുപ്പിക്കുന്നു
അവർ വാൾട്സ് നൃത്തം വയ്ക്കുന്നു
അവരൊരുമിച്ചു തെരുവിലേക്കിറങ്ങുന്നു
അവർ ചിരിക്കുന്നു
ഒരപകടം നടക്കുന്നു
അവൾക്കു ബോധം പോകുന്നു
അയാൾ ഫോൺ ചെയ്യാനായി പോകുന്നു
അയാൾ കരയുകയാണ്‌
ലൈറ്റണയ്ക്കാത്ത ഒരു വീട്ടിൽ അയാൾ എത്തുന്നു
അയാൾ ഒന്നു ഫോൺ ചെയ്യട്ടേയെന്നു ചോദിക്കുന്നു
അവിടെയാർക്കോ അയാളെ അറിയാം
ഹേ ഇരുന്നെന്തെങ്കിലും കഴിക്കെടോ
വേണ്ട ഫോൺ എവിടെയാണ്‌
എന്തെങ്കിലും കഴിക്കെന്നേ, ഹേ, കഴിച്ചിട്ടുപോടോ
അയാൾ കഴിക്കാനിരിക്കുന്നു
വധശിക്ഷയ്ക്കു വിധിക്കപ്പെട്ടവനെപ്പോലെ അയാൾ കുടിക്കുന്നു
അയാൾ ചിരിക്കുന്നു
അയാളോടവർ എന്തോ ചൊല്ലാൻ പറയുന്നു
അയാളതു ചൊല്ലുന്നു
അയാളൊടുവിൽ ഒരു ഡെസ്ക്കിനടിയിൽ കിടന്നുറക്കമാവുന്നു

***