ടൊർക്കാറ്റോ റ്റാസോ- കവിതകൾ

 

1

ഏതു മഞ്ഞുതുള്ളികളാണവ,
ഏതു കണ്ണുനീർത്തുള്ളികളാണവ,
രാത്രിയുടെ മൂടുപടത്തിൽ ചിതറിക്കിടന്നത്,
നക്ഷത്രങ്ങളുടെ വിളർത്ത മുഖത്തു നിന്നടർന്നുവീണത്?
എന്തിനാണ്‌ നറുംപുല്ലിന്റെ മടിത്തട്ടിൽ
വെളുത്ത ചന്ദ്രനൊരു വെണ്മേഘം വിതച്ചത്?
ഇരുണ്ട വായുവിൽ പുലരും വരെ
ഇളംകാറ്റുകളലഞ്ഞുനടക്കുമ്പോൾ
എന്തിനു ഞാനതിലൊരു വിലാപം കേട്ടു?
നിന്റെ വേർപാടിന്റെ അടയാളങ്ങളായിരുന്നോ അവ,
എന്റെ ജീവന്റെ ജീവനേ?

2
കാടുകളും പുഴകളും മൂകം,
അലയടങ്ങിയ കടലും ശാന്തം;
ഗുഹകളിൽ കാറ്റുകളടക്കത്തിൽ,
ഇരുണ്ട രാവിൽ ചന്ദ്രൻ ചമയ്ക്കുന്നു,
ഉന്നതമായ മൗനം;
നമ്മളുമൊളിച്ചുപിടിക്കുന്നു,
പ്രണയത്തിന്റെ മാധുര്യം;
മിണ്ടാതിരിക്കട്ടെ പ്രണയം,
അതു ശ്വാസമെടുക്കാതെയുമിരിക്കട്ടെ;
ചുംബനങ്ങൾ ശബ്ദമില്ലാതെയാവട്ടെ,
ശബ്ദമില്ലാതെയാവട്ടെ, എന്റെ നെടുവീർപ്പുകളും.

Torquato Tasso (1544-1595)- ഭാവഗീതങ്ങളുടെ പേരിൽ പ്രസിദ്ധനായ ഇറ്റാലിയൻ കവി.