ഓസ്വാൾഡ് ദി അന്ദ്രാദെ- കവിതകൾ

 ഓസ്വാൾഡ് ദി അന്ദ്രാദെ Oswald de Andrade (1890-1954) ബ്രസീലിയൻ കവിതയിലെ ഏറ്റവും വലിയ റാഡിക്കൽ ആയിരുന്നു. കവിതയിലെ ദന്തഗോപുരങ്ങളെയും സെന്റിമെന്റലിസത്തെയും പൂർണ്ണമായി നിരാകരിക്കുന്ന പുതിയൊരു കാവ്യഭാഷയ്ക്കുള്ള അന്വേഷണത്തിൽ അദ്ദേഹത്തിന്റെ മാർഗ്ഗദർശികൾ മയക്കോവ്സ്കിയും റഷ്യൻ ഫ്യൂച്ചറിസ്റ്റുകളുമായിരുന്നു. വിദേശഭാഷകളോടുള്ള ബ്രസീലിയൻ മനോഭാവത്തെ നിർവ്വചിച്ചതും അദ്ദേഹമായിരുന്നു. മുൻ തലമുറകൾ ചെയ്തതുപോലെ വൈദേശികാശയങ്ങളെ വെറുതേ അനുകരിക്കുകയല്ല ആധുനികതാവാദി ചെയ്യേണ്ടത്; അയാൾ അവയെ ചവച്ചരച്ചു ദഹിപ്പിക്കുകയും ഒരു ബ്രസീലിയൻ രൂപത്തിൽ ഛർദ്ദിക്കുകയുമാണ്‌ വേണ്ടത്.

പോർച്ചുഗീസ് പിശക്

കോരിച്ചൊരിയുന്ന മഴയത്ത്
പോർച്ചുഗീസുകാരൻ വന്നപ്പോൾ
അയാൾ ഇന്ത്യാക്കാരനെ തുണിയുടുപ്പിച്ചു.
എന്തു കഷ്ടം!
നല്ല വെയിലുള്ള പ്രഭാതത്തിലാണ്‌
അയാൾ വന്നതെങ്കിൽ
ഇന്ത്യാക്കാരൻ അയാളുടെ
തുണിയുരിഞ്ഞേനെ!

മേയ് 3

എന്റെ പത്തു വയസ്സുകാരൻ മകനിൽ നിന്ന്
ഞാൻ പഠിച്ചു,
ഞാനൊരിക്കലും കാണാത്ത കാര്യങ്ങളുടെ
കണ്ടുപിടുത്തമാണ്‌ കവിതയെന്ന്.

*