ബോദ്‌ലേർ- ജീവനുള്ള ദീപശിഖ

എനിക്കു മുന്നിലായവ നടക്കുന്നു, പ്രകാശപൂർണ്ണമായ ആ കണ്ണുകൾ,
അതിജ്ഞാനിയായൊരു മാലാഖ കാന്തശക്തി കൊണ്ടനുഗ്രഹിച്ചവ;
എന്റെ കണ്ണുകളിലേക്കു വജ്രജ്വാലകൾ കുടഞ്ഞുകൊണ്ടവ നടക്കുന്നു,
ആ ദിവ്യസഹോദരങ്ങൾ, എന്റെയും സഹോദരങ്ങൾ.

കെണികളിലും കൊടുംപാപങ്ങളിൽ നിന്നുമെന്നെയവർ കാക്കുന്നു,
സൗന്ദര്യത്തിന്റെ പാതയിലൂടെന്റെ പാദങ്ങളെയവർ നയിക്കുന്നു;
എനിക്കു സേവകരാണവർ, ഞാനവർക്കടിമയും;
എന്റെ സത്തയാകെയും ഈ ജീവനുള്ള ദീപശിഖയെ അനുസരിക്കുന്നു.

വശീകരിക്കുന്ന കണ്ണുകളേ, നിഗൂഢദീപ്തിയുമായി നിങ്ങളെരിയുന്നു,
നട്ടുച്ചയ്ക്കു കൊളുത്തിവച്ച മെഴുകുതിരികൾ പോലെ;
ചുവന്നുതുടുക്കുന്ന സൂര്യനാവില്ല, അവയുടെ വിചിത്രജ്വാല കെടുത്താൻ;

അവ കൊണ്ടാടുന്നതു മരണത്തെ, നിങ്ങൾ വാഴ്ത്തുന്നതുണർച്ചയെ;
എന്റെയാത്മാവിന്റെയുണർവ്വിനെ ഘോഷിച്ചും കൊണ്ടു നിങ്ങൾ നടക്കുന്നു,
ഒരു സൂര്യനു മുന്നിലും ജ്വാലകൾ വിളറാത്ത നക്ഷത്രങ്ങളേ!