ബോദ്‌ലേർ- ശവമടക്കം

കരാളമായൊരശുഭരാത്രിയിൽ,
വിമലതാരങ്ങളസ്തമിക്കുന്ന വേളയിൽ,
മാറാല മൂടിയൊരു പാഴ്പ്പുരയ്ക്കരികിൽ,
അണലി പെറുന്ന കുപ്പകൾക്കിടയിൽ
യൗവ്വനം പുളച്ചിരുന്ന നിന്റെയുടലിനെ
തന്റെ സന്മനസ്സു കൊണ്ടൊരാൾ
കുഴി വെട്ടിമൂടിയെന്നിരിക്കട്ടെ;
നിന്റെ ശപ്തമായ അസ്ഥികൾക്കു മേൽ,
ഋതുപ്പകർച്ചകൾക്കിടയിൽ നീ കേട്ടുകിടക്കും,
വിശപ്പു മാറാത്ത മന്ത്രവാദിനികളുടേയും
ചെന്നായ്ക്കളുടേയും ദീനരോദനങ്ങൾ,
കാമാർത്തരായ കിഴവന്മാരുടെ കൊഞ്ചലുകൾ,
കവർച്ചക്കാരുടെ ഇരുണ്ട ഗൂഢാലോചനകൾ.