ഉയേജിമ ഒനിറ്റ്സുറ Uejima Onitsura(1660-1768) ഒരു മദ്യവ്യാപാരിയുടെ മൂന്നാമത്തെ മകനായി ജനിച്ചു. വളരെ ചെറുപ്പത്തിലേ എഴുതിത്തുടങ്ങി. കവിതയിൽ കൂടുതൽ ശ്രദ്ധിക്കാനായി ജോലി ഉപേക്ഷിക്കുകയും ചെയ്തു. എഴുപത്തിമൂന്നാം വയസ്സിൽ സന്ന്യാസം സ്വീകരിച്ചു. അതിനു ശേഷം കവിതയെഴുത്തു നിർത്തുകയും ചെയ്തു.
1
ചെറിമരങ്ങൾ പൂക്കുമ്പോൾ
കിളികൾക്കു രണ്ടു കാല്‌,
കുതിരകൾക്കു നാലും.
2
ചെറിപ്പൂക്കൾ കാണുന്നവർ
പട്ടുടുത്ത
അസ്ഥികൂടങ്ങൾ.
3
വരുന്ന ശരല്ക്കാലത്ത്
ചന്ദ്രനെ നോക്കുമ്പോൾ
എന്റെ മടിയിൽ കുഞ്ഞുണ്ടാവില്ല.
(ആറു വയസ്സായ മകൻ മരിച്ചപ്പോൾ എഴുതിയത്)
4
ആളുകളെക്കണ്ടൊളിക്കുന്നു,
ആളുകളെ പരിചയിക്കുന്നു
-കുരുവിക്കുഞ്ഞുങ്ങൾ.
5
എനിക്കെന്റെ സ്വപ്നം മതി,
നീ വിളിച്ചുകാണിച്ച ചന്ദ്രനതാ,
മൂടല്മഞ്ഞിൽ മറഞ്ഞു കാക്കേ.
(മരണത്തിനു മുമ്പെഴുതിയത്)
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ