യഹൂദ അമിഹായി- എല്ലാം തികഞ്ഞ സ്ത്രീ

തന്റെ അഭിലാഷങ്ങളെല്ലാറ്റിലും നിന്ന്
ഒരാദർശസ്ത്രീയെ മെനഞ്ഞെടുത്ത ഒരാളെ എനിക്കറിയാം:
മുടിയെടുത്തത് കടന്നുപോയ ഒരു ബസ്സിന്റെ ജനാലയ്ക്കൽ കണ്ട
ഒരു സ്ത്രീയിൽ നിന്ന്,
നെറ്റിത്തടം ചെറുപ്പത്തിലേ മരിച്ച ഒരു കസിന്റേത്,
കുട്ടിക്കാലത്തു തന്നെ പഠിപ്പിച്ച ഒരു ടീച്ചറുടെ കൈകൾ,
തന്റെ ബാല്യകാലകാമുകിയുടെ കവിളുകൾ,
ടെലിഫോൺ ബൂത്തിൽ വച്ചു കണാനിടയായ ഒരു സ്ത്രീയുടെ ചുണ്ടുകൾ,
ബീച്ചിൽ മലർന്നുകിടക്കുന്ന ഒരു ചെറുപ്പക്കാരിയുടെ തുടകൾ,
ഇവളുടെ വശ്യമായ നോട്ടം, അവളുടെ കണ്ണുകൾ,
ഒരു പത്രപ്പരസ്യത്തിൽ നിന്ന് അരക്കെട്ടും.
താൻ ശരിക്കും പ്രേമിക്കുന്നൊരു സ്ത്രീയെ
ഇതെല്ലാറ്റിൽ നിന്നും അയാൾ ഇണക്കിയെടുത്തു.
അയാൾ മരിച്ചപ്പോൾ, അവർ, ആ സ്ത്രീകളെല്ലാം വന്നു-
അറുത്തുമാറ്റിയ കാലുകളുമായി, തുരന്നെടുത്ത കണ്ണുകളുമായി,

പിഴുതെടുത്ത മുടിനാരുകളുമായി,
പാതി കീറിയ മുഖങ്ങളുമായി, അരിഞ്ഞെടുത്ത കൈകളുമായി,
ചുണ്ടുകളുണ്ടായിരുന്നിടത്ത് ആഴത്തിലൊരു കീറലുമായി;
തൻ്റേത്, തൻ്റേത്, തൻ്റേതാവശ്യപ്പെട്ട് അവർ വന്നു,
അവർ അയാളുടെ ശരീരം തുണ്ടുതുണ്ടാക്കി,
മാംസം ചീന്തിയെടുത്തു,
പണ്ടേ തുലഞ്ഞുപോയ ഒരാത്മാവു മാത്രം അയാൾക്കു ബാക്കിവച്ചു.
(1999)