ഒരു മാതളപ്പഴമായിരുന്നു എന്റെ ചുംബനം,
തുറന്നതും അഗാധവും;
കടലാസ്സു കൊണ്ടൊരു പനിനീർപ്പൂ,
നിന്റെ വദനം.
പശ്ചാത്തലം, ഒരു മഞ്ഞുപാടം.
അടകല്ലുകൾക്കു കൂടങ്ങളായിരുന്നു
എന്റെ കൈകൾ;
മണി മുഴങ്ങുന്ന സായാഹ്നം,
നിന്റെയുടൽ.
പശ്ചാത്തലം, ഒരു മഞ്ഞുപാടം.
നീലിച്ച കപാലം വായ തുറന്നു.
അതിനുള്ളിൽ തൂങ്ങിക്കിടന്നിരുന്നു,
തൂങ്ങിക്കിടക്കുന്ന ചുണ്ണാമ്പുകല്ലുകൾ പോലെ
എന്റെ ‘നിന്നെ ഞാൻ പ്രേമിക്കുന്നു’ എന്ന വാക്കുകൾ.
പശ്ചാത്തലം, ഒരു മഞ്ഞുപാടം.
എന്റെ കൗമാരസ്വപ്നങ്ങളിൽ
കരിമ്പായലടിഞ്ഞു.
കുതിച്ചുയർന്ന എന്റെ വേദന
ചന്ദ്രനേയും തുളച്ചുകയറി.
പശ്ചാത്തലം, ഒരു മഞ്ഞുപാടം.
ഉന്നതമായ പാഠശാലകളിൽ
ഞാനിപ്പോൾ പരിശീലിപ്പിക്കുന്നു,
എന്റെ പ്രണയത്തെയും എന്റെ സ്വപ്നങ്ങളെയും
(കണ്ണു കാണാത്ത കുതിരകളെ).
പശ്ചാത്തലമോ, ഒരു മഞ്ഞുപാടം.
(1920 ഒക്ടോബർ, ഗ്രനാഡ)
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ