കോപിഷ്ടനായൊരു മാലാഖ കഴുകനെപ്പോലെ പറന്നിറങ്ങുന്നു,
ആ നിഷേധിയുടെ മുടിക്കു കുത്തിപ്പിടിച്ചുകൊണ്ടലറുന്നു:
“പ്രമാണമെന്താണെന്നു നീയറിയണം!
(നിന്റെ നല്ല മാലാഖയല്ലേ ഞാൻ?) എന്നെ അനുസരിക്കുക!
മുഖം ചുളിക്കാതെ സ്നേഹിക്കണമെന്നു നീയറിയണം,
പാവങ്ങളെ, തെമ്മാടികളെ, പീഡിതരെ, മനസ്സുലഞ്ഞവരെ,
അങ്ങനെ നിന്റെയനുകമ്പ ഭൂമിയിൽ വിരിക്കട്ടെ,
ദൈവപുത്രനെഴുന്നെള്ളും നാളിൽ അവനായൊരു പരവതാനി.
അതാണ്‌ സ്നേഹം! നിന്റെ ഹൃദയം മരവിക്കും മുമ്പേ,
ദൈവത്തിൽ നിന്നതിന്റെ തിരി കൊളുത്തൂ, അവനായെരിയൂ;
അതു മാത്രമായിരിക്കും നിനക്കു ശേഷിക്കുന്ന ആനന്ദം!”
സ്നേഹിക്കുന്നളവിൽത്തന്നെ ശിക്ഷിക്കുകയും ചെയ്യുന്ന മാലാഖ
കൂറ്റൻ മുഷ്ടികൾ കൊണ്ടാ നിഷേധിയെ പ്രഹരിക്കുന്നു;
ആ ശപ്താത്മാവു പക്ഷേ, അപ്പോഴും പറയുന്നു: “ഞാൻ അനുസരിക്കില്ല!”
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ