ബോദ്‌ലേർ - പൂച്ച

എന്റെ പ്രണയാതുരഹൃദയത്തിലേക്കു വരൂ നീ, സുന്ദരിപ്പൂച്ചേ,
നിന്റെ കൂർത്തുമൂത്ത നഖങ്ങളുറയിൽത്തന്നെ കിടക്കട്ടെ.
വൈഡൂര്യം ലോഹവുമായിടഞ്ഞു തീപ്പൊരി പാറുന്ന
നിന്റെ മനോഹരനയനങ്ങളിലേക്കു ഞാനെടുത്തുചാടട്ടെ.

എന്റെ വിരൽത്തുമ്പുകളലസമായി നിന്നെത്തലോടുമ്പോൾ,
നിന്റെ തലയിലൂടെ, പുറവടിവിലൂടെന്റെ വിരലുകളോടുമ്പോൾ,
എന്റെ കൈ നിന്റെയുടലിന്റെ ആലക്തികസ്പർശനത്താൽ
പരമാനന്ദത്തിന്റെ ലഹരി പൂണ്ടുന്മത്തമാകുമ്പോൾ,

എന്റെ മനക്കണ്ണിൽ ഞാൻ കാണുന്നതെന്റെ പെണ്ണിനെ.
അവളുടെ നോട്ടം, അരുമമൃഗമേ, നിന്റേതുപോലെ ഗഹനം,
ശീതം, ചാട്ടുളി പോലെ വന്നുതറയ്ക്കുന്നതും.

പിന്നെയവളുടെ മുടി മുതൽ കാൽവിരൽത്തുമ്പിനോളം
അവളുടെയിരുണ്ട ദേഹത്തെച്ചുഴന്നൊഴുകിനടക്കുന്നു,
നിഗൂഢമായൊരുദ്ധതഭാവം, അപായപ്പെടുത്തുന്നൊരു ഗന്ധം.