ഉഷ്ണിക്കുന്ന ശരല്ക്കാലരാത്രിയിൽ ഇരുകണ്ണുകളും പൂട്ടി
നിന്റെ ചുടുന്ന മാറിടത്തിന്റെ പരിമളം ശ്വസിച്ചു കിടക്കുമ്പോൾ
എനിക്കു മുന്നിലനാവൃതമാകുന്നു, ധന്യതയുടെ വിദൂരതീരങ്ങൾ,
ഒരു നിരന്തരസൂര്യന്റെ ജ്വാലകളേറ്റവ വെട്ടിത്തിളങ്ങുന്നു.
സുഖാലസ്യത്തിന്റെയാ പ്രശാന്തദ്വീപിലെനിക്കു കാണാം,
വിചിത്രമായ വൃക്ഷങ്ങൾ, സ്വാദിഷ്ഠമായ ഫലങ്ങൾ;
ഉടൽ മെലിഞ്ഞതും ഉശിരുള്ളവരുമാണവിടെ പുരുഷന്മാർ,
ആശ്ചര്യപ്പെടുത്തുന്നൊരാർജ്ജവം സ്ത്രീകളുടെ കണ്ണുകളിൽ.
ആ വശ്യതീരത്തേക്കു നിന്റെ ഗന്ധമെന്നെ നയിക്കുമ്പോൾ
ഒരു പ്രയാണത്തിന്റെ തളർച്ച മാറാത്ത കപ്പല്പായകളും
പാമരങ്ങളുമിടതിങ്ങിയൊരു തുറമുഖം ഞാൻ കാണുന്നു,
പച്ചപ്പുളിമരങ്ങളുടെ പരിമളം വായുവിലെങ്ങും പരക്കുന്നു,
ശ്വാസവായുവിലൂടതെന്റെയുള്ളിലേക്കു പടരുന്നു,
നാവികരുടെ ഗാനവുമായതെന്റെയാത്മാവിൽ കലരുന്നു.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ