എന്റെ ഉൾശബ്ദത്തിന്‌
എനിക്കൊരുപദേശവും നല്കാനില്ല
ഒരു മുന്നറിയിപ്പും തരാനില്ല
ആകാമെന്നോ അരുതെന്നോ
അയാൾ പറയാറില്ല
തീരെപ്പതിഞ്ഞിട്ടാണത്
കാതില്പതിഞ്ഞാലൊട്ടു തിരിയുകയുമില്ല
എത്രയൊക്കെ കുനിഞ്ഞുനിന്നാലും
ചില അക്ഷരങ്ങളേ നിങ്ങൾ കേൾക്കുന്നുണ്ടാവൂ
എല്ലാ അർത്ഥങ്ങളും ചോർന്നുപോയിട്ടുമുണ്ടാവും
അതു കേൾക്കാതിരിക്കാൻ വേണ്ടി
ഞാൻ ഒച്ചയുയർത്താറില്ല
മര്യാദയോടെയാണ്‌ ഞാനയാളോടു പെരുമാറുക
എനിക്കു തുല്യനാണയാളെന്നും
അതിപ്രധാനമായ കാര്യമാണയാൾ പറയുന്നതെന്നും
ഞാൻ അഭിനയിക്കും
ചിലനേരം ഞാൻ അയാളുമായി
സംഭാഷണം ചെയ്യാനും ശ്രമിക്കാറുണ്ട്
-ഇന്നലെ ഞാൻ വിസമ്മതിച്ചു കേട്ടോ
ഇന്നുവരെ ഞാൻ അങ്ങനെ ചെയ്തിട്ടില്ല
ഇനി ചെയ്യാനും പോകുന്നില്ല
-ഗ്ലു-ഗ്ലു
-അപ്പോൾ നിങ്ങൾ പറയുന്നത്
ഞാൻ ചെയ്തതു ശരിയാണെന്നാണോ
-ഗാ-ഗോ-ഗി
നമുക്കൊരേ അഭിപ്രായമാണെന്നറിഞ്ഞതിൽ
സന്തോഷം
-മാ-ആ-
-ഇപ്പോൾ പോയൊന്നു വിശ്രമിക്കൂ
നമുക്കു നാളെ വീണ്ടും കാണാം
എനിക്കയാളെക്കൊണ്ട് ഒരുപയോഗവുമില്ല
എനിക്കയാളെ വേണമെങ്കിൽ മറന്നുകളയാം
എനിക്കൊരു പ്രതീക്ഷയുമില്ല
സഹതാപം കൊണ്ടു മൂടി
അയാൾ അവിടെക്കിടക്കുമ്പോൾ
വിഷമിച്ചു ശ്വാസമെടുത്തുകൊണ്ട്
വായ തുറക്കുമ്പോൾ
നിശ്ചേഷ്ടമായ തല പൊന്തിക്കാൻ നോക്കുമ്പോൾ
ചെറിയൊരു കുറ്റബോധം മാത്രം
(1961)
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ