തലയ്ക്കുള്ളിൽ ഉദ്യാനങ്ങൾ വളർത്തുന്ന
ചിലരുണ്ട്
അവരുടെ മുടിയിഴകളിൽ നിന്നുള്ള പാതകൾ
വെയിലു വീഴുന്ന വെളുവെളുത്ത നഗരങ്ങളിലേക്കു നയിക്കുന്നു
അവർക്കെഴുതാൻ വളരെയെളുപ്പമാണ്‌
അവർ കണ്ണുകളടയ്ക്കുമ്പോഴേക്കും
ബിംബങ്ങളുടെ മീൻപറ്റങ്ങൾ
അവരുടെ നെറ്റിയിൽ നിന്നൊഴുകിയിറങ്ങുകയായി
എന്റെ ഭാവന
ഒരു പലകക്കഷണമാണ്‌
എനിക്കാകെയുള്ള പണിയായുധം
ഒരു മരമുട്ടിയുമാണ്‌
ഞാൻ പലകയിലടിക്കുന്നു
അതെനിക്കുത്തരം തരുന്നു
അതെ-അതെ
അല്ല-അല്ല
മറ്റുള്ളവർക്കാണ്‌ മരത്തിന്റെ പച്ചമണി
ജലത്തിന്റെ നീലമണി
എനിക്കുള്ളതൊരു കൊട്ടുവടി
കാവലില്ലാത്ത തോട്ടത്തിൽ നിന്നു സമ്പാദിച്ചത്
ഞാൻ പലക മേൽ തട്ടുന്നു
അതെന്നെ പ്രചോദിപ്പിക്കുന്നു
ഒരു സദാചാരചിന്തകന്റെ വരട്ടുകവിത കൊണ്ട്
അതെ-അതെ
അല്ല-അല്ല
(1957)
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ