സ്ബിഗ്നിയെഫ് ഹെർബെർട്ട് - മുറി

 

ഈ മുറിയിൽ മൂന്നു സ്യൂട്ട്കേസുകളുണ്ട്
എന്റേതല്ലാത്ത ഒരു കിടക്കയുണ്ട്
കണ്ണാടിയിൽ പൂപ്പൽ പിടിച്ച ഒരലമാരയുമുണ്ട്

ഞാൻ വാതിൽ തുറക്കുമ്പോൾ
ഫർണീച്ചർ വെറുങ്ങലിച്ചുനില്ക്കുന്നു
ഒരു പരിചിതഗന്ധം എന്നെ എതിരേല്ക്കുന്നു
വിയർപ്പ് ഉറക്കമില്ലായ്മ വിരിപ്പുകൾ

ചുമരിലെ ഒരു ചിത്രത്തിൽ
വെസൂവിയസ്
പുകയുന്ന മകുടവുമായി

ഞാൻ വെസൂവിയസ് കണ്ടിട്ടേയില്ല
സജീവമായ അഗ്നിപർവ്വതങ്ങളിൽ എനിക്കു വിശ്വാസവുമില്ല

മറ്റേച്ചിത്രം
ഒരു ഡച്ച് ഇന്റീരിയറാണ്‌

ചൂഴുന്ന നിഴലിൽ
ഒരു സ്ത്രീയുടെ കൈകൾ
ഒരു ജഗ്ഗ് ചരിക്കുന്നു
അതിൽ നിന്ന് ചരടുപോലെ പാലിറ്റുന്നു

മേശപ്പുറത്ത് ഒരു കത്തി ഒരു നാപ്കിൻ
റൊട്ടി മീൻ ഉള്ളി

ഒരു സുവർണ്ണവെളിച്ചത്തിനു പിന്നാലെ പോയി
നാം മൂന്നു പടികളിലെത്തുന്നു
തുറന്ന വാതിലുകൾക്കു പുറത്ത്
ഒരുദ്യാനത്തിന്റെ ചതുരം

ഇലകൾ വെളിച്ചം ശ്വസിക്കുന്നു
കിളികൾ പകലിന്റെ മാധുര്യം പുലർത്തുന്നു

അയഥാർത്ഥമായ ഒരു ലോകം
റൊട്ടി പോലെ ഊഷ്മളം
ആപ്പിൾ പോലെ സുവർണ്ണം

അടരുന്ന വാൾപേപ്പർ
പരിചിതമല്ലാത്ത ഫർണീച്ചർ
വെള്ളെഴുത്തു പിടിച്ച കണ്ണാടികൾ
ഇതാണ്‌ ശരിക്കുമുള്ള വീട്ടകങ്ങൾ

എന്റെ മുറിയിൽ
മൂന്നു സ്യൂട്ട്കേസ്സുകളിൽ
പകൽ അലിഞ്ഞുചേരുന്നു
തളം കെട്ടുന്നൊരു സ്വപ്നമായി
(1957)