ആത്മാവിനെന്തു സംഭവിച്ചു
ഹാ പുലരും വരെ എല്ലാ രാത്രിയിലും
വെള്ളച്ചിറകടിച്ചിരുന്ന
കൂറ്റൻ പക്ഷിയല്ല ഇന്നത്
മരിച്ച നെഫെർറ്റിറ്റിയുടെ
വായിൽ നിന്ന്
ഒരു ചിത്രശലഭം പറന്നുപൊങ്ങി
മഴവിൽനിറത്തിൽ
ഒരുച്ഛ്വാസം പോലെ
ഒരു ചിത്രശലഭം
ഒടുവിലത്തെ നെടുവീർപ്പിൽ നിന്ന്
തൊട്ടടുത്ത നിത്യതയിലേക്ക്
എത്രദൂരം യാത്ര ചെയ്യണം
മരിച്ച നെഫെർറ്റിറ്റിയുടെ ശിരസ്സിനു മേൽ
ഒരു ചിത്രശലഭം വട്ടം ചുറ്റിപ്പറക്കുന്നു
പട്ടു കൊണ്ടൊരു
കൊക്കൂൺ നെയ്യുകയാണത്
നെഫെർറ്റിറ്റീ
ലാർവേ
നിന്റെ മടക്കത്തിനായി
എത്രകാലം നീ കാത്തിരിക്കണം
ഒറ്റപ്പകലിലേക്ക്
ഒറ്റരാത്രിയിലേക്ക്
നിന്നെ ഉയർത്തുന്ന
ചിറകടിക്ക്
എല്ലാ കവാടങ്ങൾക്കും ഗർത്തങ്ങൾക്കും മേൽ
സ്വർഗ്ഗത്തെ എല്ലാ ചെങ്കുത്തായ ചരിവുകൾക്കും മേൽ
(1957)
നെഫെർറ്റിറ്റി (Nefertiti)- ക്രി.മു. പതിനാലാം നൂറ്റാണ്ടിൽ ജീവിച്ചിരുന്ന ഈജിപ്ഷ്യൻ രാജ്ഞി. 1913ൽ കണ്ടെടുത്ത നെഫെർറ്റിറ്റിയുടെ പ്രതിമ പ്രാചീനകാലത്തെ സ്ത്രീസൗന്ദര്യത്തിന്റെ ഏറ്റവും ഉത്കൃഷ്ടമായ മാതൃകയായി കണക്കാക്കപ്പെടുന്നു.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ