ഇന്നുവരെ
ഞാൻ സംസാരിച്ചിട്ടില്ല- അവളുമായി
പ്രണയത്തെക്കുറിച്ചോ
മരണത്തെക്കുറിച്ചോ
തങ്ങളിൽത്തന്നെ മുഴുകി
അടുത്തടുത്തു കിടക്കുമ്പോൾ
ഞങ്ങൾക്കിടയിലോടിയിരുന്നത്
അന്ധമായ രുചി മാത്രം
മൂകമായ സ്പർശം മാത്രം
അവളുടെ ഉള്ളിലേക്ക്
എനിക്കൊന്നൊളിഞ്ഞുനോക്കണം
ഉള്ളിന്റെയുള്ളിൽ
എന്താണവൾ ധരിച്ചിരിക്കുന്നതെന്ന്
എനിക്കു കാണണം
ചുണ്ടു വിടർത്തി
അവൾ കിടന്നുറങ്ങുമ്പോൾ
ഞാൻ ഒളിഞ്ഞുനോക്കി
എന്താണ്‌
എന്താണ്‌
അവിടെ ഞാൻ
കണ്ടതെന്നറിയാമോ
ഞാൻ പ്രതീക്ഷിച്ചത്
മരച്ചില്ലകളായിരുന്നു
ഞാൻ പ്രതീക്ഷിച്ചത്
ഒരു കിളിയെയായിരുന്നു
ഞാൻ പ്രതീക്ഷിച്ചത്
ഒരു വീടായിരുന്നു
നിശ്ശബ്ദമായ ഒരു വൻതടാകക്കരെ
എന്നാൽ അവിടെ
ഒരു ചില്ലുകൂട്ടിനുള്ളിൽ
ഞാൻ കണ്ടത്
സില്ക്കിന്റെ ഒരു ജോഡി സ്റ്റോക്കിങ്ങ്സുകൾ
എന്റെ ദൈവമേ
ഞാനതു വാങ്ങും
ആ സ്റ്റോക്കിങ്ങ്സുകൾ
അവൾക്കു ഞാൻ വാങ്ങിക്കൊടുക്കും
എന്നാൽ-
പിന്നെയാ കുഞ്ഞാത്മാവിന്റെ
ചില്ലുകൂട്ടിൽ എന്താവും കാണുക
ഒരു സ്വപ്നത്തിന്റെ
ഒരു വിരൽ കൊണ്ടുപോലും
സ്പർശിക്കാനാവാത്തതൊന്നാവുമോ
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ